Kɛ' ‑nɩa 'de 'sraa ‑saʋn 'a ‑tɩ' 'ʋn ɛ
21
Nyɔsoa wluɛ 'de Moisɩ ‑pee ka: ‑Ɩn ‑wlu 'de 'sraa ‑saʋn ‑ʋʋ ‑nɩa Aarɔn ɔ' "nynuu ‑pee ka: 'Sraa ‑sai jrɔ' 'bo ɔɔ' nyɔ ‑mɛa 'a "ku "i blaa' ‑wɛe ɛ jeɔ ‑flɛn" kpʋʋn-. 2 ‑Bo ɛ se ɔɔ' ‑gbu" ‑sɔn nyʋ nɩ ɛ: Ɔ de, ɔ "bo, ɔɔ' "junmɔuju, ɔɔ' "ju nynɔkpaoju, ɔɔ' dedi 3 'dewlɛ ‑bo ɔɔ' dedi 'nynɔkpao se jra "ti ɛ ɔ 'bɛɛ ɔ 'je ʋʋa' "ku "i bla ʋ nɩɛ 'de ʋa' 'cɛ wɛɩn" ke, ʋ se 'e nyɔ jrɔ' ɔ' ‑gbu" ‑sɔn mu ke. 4 Ɔ nɩɛ klaa" 'de ɔɔ' 'cɛ "klu ɔ 'bo ɔɔ' ‑cɛ" ‑flɛn" kpʋʋɛ ‑wɛe ɔ je ɔɔ' -cɛ" "ku "kpei ‑sa.5 -Bo 'kwɛ 'wlʋʋ 'sraa ‑saʋn i ɛ ʋʋ 'bo "mɩɩ 'dii ceɛn, ʋʋ 'bo ‑fɩn wɛi ceɛn, 'de ʋʋ 'bo ʋʋa' ‑cɛ" kwii -keɛ. 6 Ʋʋa muɛ kpɔi" ‑teea' 'de ʋʋa' kea 'a dbo 'a -tɩ' 'ʋn, ‑wɛe ʋʋ se ʋʋa' Kea "ku "kpei ‑sai, dɛ dɛ‑nʋɛ' ʋʋ mu a ‑saa 'diidɩ ‑wee' nɛ dia 'sraa 'ʋn ‑ʋʋa ‑nyɩɛ" Nyɔsoa. Ɛmɛ ‑tɩ ʋʋ 'je i ‑kwɛ.
7 'Nynɔkpao ‑tea ‑kwlɔi ke -jʋ -jʋa "junmɔu 'dewlɛ nyʋ 'bɔa a se ʋʋpʋ "bli "ti i, dɛ dɛ‑nʋɛ' mɛ ‑nɩ 'sraa ‑sai ‑teeɛ kpɔi" 'de ɔɔ' Kea 'a ‑tɩ' 'ʋn. 8 Aoa muɛ ɔ ja ‑gbʋn a ka nyɔ ‑kwɛai nɩa, dɛ dɛ‑nʋɛ' ɔmɔ ‑ɔɔ ‑saa dɩ 'sraa 'ʋn ‑ɔɔ "nyɩ Kea, ‑ɩn ‑gbʋn ɔ ja ka nyɔ ‑kwɛai nɩa dɛ dɛ‑nʋɛ' mɛ ‑nɩ 'ɩn ‑kwɛ i, 'mɔ Nyɔsoa ‑ɔ nʋɛ ‑wɛe ao je i ‑kwɛ.
9 ‑Bo 'sraa ‑sai 'a 'nynɔkpaoju a sea 'nynɩa dɛ nʋɛ ‑mɛ ʋ wlɛɛn ʋʋa' ‑cɛ" wɔn ‑wɛe ʋa ‑sa ʋ "bo "ku "kpei ʋ 'je "jri pooɛ ‑o.
10 'Sraa ‑sai klaa" ‑ɔ ‑tea 'de 'sraa ‑saʋn ‑siae' "jru kpɔ, nyɔ poa 'cna "jru ‑wɛe ‑ɔɔ paa 'sraa ‑sa ‑dɩ 'ʋn -bo 'kwɛ 'wlʋ ɔ i, ɔ seɛ bɛɛ‑ ɔɔ' "mɩɩ 'je ‑flan ‑kaan nɩ- 'dewlɛ ɔ 'je ɔɔ' "bai i 'fae-. 11 Ɔ se "ku jrɛ' ‑pʋn" kpa i, ɔ se ɔɔ' ‑cɛ" ‑flɛn" kpʋʋi 'de ɔ "bo mɔ ke ɔ 'de 'a ‑tɩ' 'ʋn. 12 Ɔ se 'de ɔɔ' Kea 'a ‑gbu" ‑kwɛai 'di 'wlʋ i, ‑wɛe ɔ jeɛ ‑flɛn" kpʋʋn, dɛ dɛ‑nʋɛ' ɔ poɛ 'cna ‑kwɛai "jru 'de ɔɔ' Kea 'a ‑tɩ' 'ʋn. 'Mɔ ‑nɩ Nyɔsoa.
13 'Nynɔkpaoju ‑saan" ‑ʋ ‑sea' "junmɔu juo mu ɔ 'je 'ʋn "duo ‑wɛe ‑ʋ ‑jeɔ "bli "ti. 14 Ɔ seɛ 'bɛɛ ɔ 'je ‑teɔn" 'nynɔ o, 'nynɔkpao nyɔ ‑sa 'kwla ke, 'dewlɛ ‑kwlɔ i ‑te 'nynɔ nyʋ -sa -suu "kpei mu ɔ 'je 'ʋn "duo ‑wɛe ʋ 'je ɔ "bli "ti, 'kaa 'nynɔkpaoju ‑ʋ sea "junmɔu juo 'de ‑ʋ ‑wlʋa 'de ɔɔ' 'cɛ "klu. 15 -Bo ɛ nɩ 'kan a -mɛ ɔɔ' "ji -wee' a muɛ 'sraa -saʋn nɩa', dɛ dɛ‑nʋɛ' 'mɔ ‑nɩ Nyɔsoa 'mɔ ‑teeɔ kpɔi" 'de 'ma dbo 'a -tɩ 'ʋn.
16 Kea wluɛ Moisɩ ‑pee ka ɛ 'na: 17 ‑Ɩn ‑wlu 'de Aarɔn ‑pee ‑ɩn ‑na: Nyɔ "oo nyɔ 'de ‑ma "ji 'a "ji 'di ‑ɔɔ mua nɛa' ɔ 'bo 'e kpaa ɔ 'bo 'sraa ‑saa ɔ 'bo ɔɔ' Kea "nyɩɛ. 18 'Sraa -saʋn "klein ‑ʋʋ ‑nɛɛa ʋʋ seɛ 'bɛɛ ʋʋ 'je 'e "Kpa -pʋn" 'kpa: Nyʋ ‑a "jri wa o nyʋ ‑ʋa -kpaa' bʋ "kpei o, nyʋ ‑ʋa "jua ‑saai" o, 'dewlɛ nyʋ ‑ʋa 'dae sea 'ʋn tɛɛn o, 19 ɛ ke nyɔ -ɔ sʋn 'dewlɛ bʋ ‑cra' ‑wɛe ɛ poa nɛɛa' "jru "kpei ke, 20 ‑ɔ ‑nɩa ‑sɛn "kpei 'dewlɛ ‑ɔ ‑nɩa "kwlɛn kwlɛn-, ‑ɔ ‑nɩa ‑puo "jri "kpei, ‑ɔ ‑blea 'pleɛ‑, nyɔ -ɔ ku -pʋn" 'wɛ nea 'dewlɛ ‑ɔ -waa 'ʋn. 21 Nyʋ ‑wlʋa 'e 'sraa ‑sai Aarɔn ɔ' "ji 'di ‑wɛe ‑ʋʋa ‑ta -jrɔ' nɛɛa' ʋʋ se 'sraa ‑ɛ ‑wee' nɛ dia' ‑sai ʋʋ se Nyɔsoa "nyɩ i, ‑jɛ ɔɔ' 'fɔ jrɛ' nɛɛa' ɛ ‑mɛ ɔ seɛ bɛɛ‑ ɔ 'je dɩ 'sraa 'ʋn ‑saa ɔ 'je Kea "nyɩ. 22 Dɩ ‑nɩa ɔɔ' Kea 'a diiɛ ɔ 'bɛɛ ɔ 'jɩ di, 'sraa dɩ ‑jɩ ‑kwɛai ke ‑jɩ ‑kwɛai 'pepe o, 23 'Kaa ɔ seɛ 'bɛɛ ɔ 'je tae' fɔ klaa" ke "kpa ‑ɛ "kpei nyɔ ɔ ‑saa 'sraa ‑pʋn" 'kpa 'de ɔɔ' nɛɛa' ‑tɩ' 'ʋn, ‑bo ɛ nɩ 'kan ‑mɛ ɔ se 'ma -gbɛɛna' ‑kwɛai ke ɛɛ' dɩ "klein nɩɛ 'di ‑flɛn" kpʋʋn i, dɛ dɛ‑nʋɛ' 'mɔ Nyɔsoa 'mɔ ‑ɔɔ nʋɛ ‑wɛe ʋʋa ‑kwɛ i.
24 Moisɩ 'tmʋʋ wlu ‑nɩ Aarɔn o ɔɔ' "nynuu ke Israɛ -nyʋ ‑wee' "klein 'mɛ.